Category: Alén da Onda

Alén da Onda 7

Descarga o programa en formato Mp3

Descarga o programa en formato Ogg

Na sétima edición de Alén da Onda os nosos expertos científicos do paranormal enfróntanse ao fenómeno PUFO, a colonización alieníxena das altas esferas do poder mundial por parte dos reptilianos, extraterrestres procedentes do planeta Clarión, espello ultraneoliberal do planeta Terra situado do outro lado do Sol. Na secuencia da análise apreséntase un documento arrepiante sobre a abducción de Mariano Rajoy por loxias clarionitas días despois da súa victoria electoral e coméntase a vaga de OVNIS comandada pola Audiencia Nacional que vén de sementar o caos municipal en varias cidades galegas durante as últimas semanas. A estrutura piramidal do poder reptiliano e os seus abraiantes atributos vitais fican esclarecidos de vez no programa máis aterrador e psíquicamente avanzado da FM galaica, onde todo é posíbel.

Alén da Onda, no máis alá do dial, no 107.9FM da Radio Kalimera.

Colaboran neste programa Carlos Meixide, Marga Alborés, Expósito Alcocer, Carlos Santiago e Mariano Rajoy Brey.



Alen da Onda Especial Eleccions 2011

Descargar programa en formato Mp3

Descargar programa en formato Ogg

Seguimento da noite electoral nunha edición especial de Alén da Onda, con análises das primeiras enquisas parapsicolóxicas, debate sobre a inminencia do Novo Culto Mariano e a transcendencia mística do 20-N na historia de España. Como perla do programa unha entrevista con Mariano Rajoy, minutos antes de encamiñarse ao balcón xenovés para se dirixir aos congregados da nova fé política, concedida en exclusiva a Alén da Onda, como programa top no mundo do misterio e as ciencias paralelas. Os nosos expertos científicos do paranormal desentrañan todas as verdades ocultas e os fenómenos fantasmagóricos concorrentes nas eleccións xerais do 2011 e anticipan os vieiros místicos polos que decorrerá o novo tempo político baixo a éxide deste mesías galego e ben barbado.

Alén da Onda, no máis alá da política, no 107.9 da Kalimera Radio Livre

Colaboran neste programa: Expósito Alcocer, Marga Alborés, Carlos Meixide, Tomás Lijó, Carlos Santiago e Francisco Franco Baamonde

 

 



Alen da Onda 6

Descargar programa en formato Mp3

Descargar programa en formato Ogg

Na sexta edición de Alén da Onda, na inminencia dos comicios máis fantasmagóricos da historia de España, os nosos expertos científicos do paranormal analizan o mundo das pantasmas, o advento do Novo Culto Mariano e o arrepiante fenómeno de Poltergeist que conmociona estes días a Casa Real. Contamos neste programa con convidados especiais como o exalcalde da Coruña, Francisco Vázquez, atormentado por unha pantasma durante a súa estancia de embaixador na Cidade do Vaticano, o Espírito da Constitución, o Espírito da Contradición, o Espírito Santo e a intervención estelar da Pantasma da Ópera. Conducindo o programa, como sempre, Casimiro Canalillo e os seus contertulios, o exitólogo Ezequiel Daniel, a cultísima ocultista Garma Alba e o catedrático de Parapsicoloxía Aplicada da Universidade de Uppsala, Nero Relicario, que nos conducirán por unha nova e estarrecedora viaxe ao mundo do paranormal nunha nova edición do programa máis arrepiante da FM galaica.

Alén da Onda, no máis alá do teu dial.

Colaboran neste programa Mónica de Nut, Expósito Alcocer, Marga Alborés, Carlos Meixide, Carlos Santiago, Anxo Villaverde, Juan Carlos I e Juan Felipe Froilán de Tódolos Santos.

 



Alén da Onda 5

 

Descarregar programa mp3

Descarregar programa ogg

Nunha nova edición de Alén da Onda os nosos expertos científicos do paranormal abordan o Samaín e o mundos dos defuntos xusto no inicio da campaña electoral máis estarrecedora dos últimos tempos. Estrañas psicofonías no Valle de los Caídos parecen anunciar unha nova e arrepiante etapa na historia do estado español despois do 20-N, día do pasamento de mortos ilustres como Francisco Franco, Jose Antonio Primo de Rivera e Buenaventura Durruti. Nunha entrevista exclusiva con Mariano Rajoy tratamos de aclarar as incertezas deste futuro tremelicante que nos agarda á volta da esquina. Decidirá o voto defunto o próximo presidente do goberno de España? Haberá recortes nas pensións para os mortos galegos? Será esta a fin do estado do benestar no mundo do alén? E sobre todo, perderán os nosos defuntos o dereito de voto establecido polo estatuto de autonomía do ano 82? Estas e outras inquietantes cuestións nunha nova edición do programa radiofónico máis aterrador da FM galaica.

Alén da Onda, no máis alá do teu dial.

Colaboran neste programa Expósito Alcocer, Marga Alborés, Tomás Lijó, Carlos Meixide, Carlos Santiago e Francisco Franco Baamonde

 

 



Alén da Onda 4

 

 

Descarregar programa mp3

Descarregar programa ogg

Despois do éxito acadado coa demisión do Deán da catedral, Don José María Díaz, apenas dúas horas despois do programa dedicado ao Códice Calixtino, Alén da Onda aborda outro asunto candente da actualidade, a Transfusión das Caixas, e pon ao nú as conspiracións, leas e traicións no poderoso lobby vampírico que atenaza o sistema financeiro galego. A guerra entre o grupo sanguíneo coruñés e o grupo sanguíneo vigués, as dúas grandes familias de vampiros que se reparten o poder nas tebras do macizo galaico é o asunto estrela desta edición de Alén da Onda onde non se desatenden outras novas relevantes do mundo paranormal, como a psicofonía de Guitiriz, detonador do último escándalo no Ministerio de Fomento do Goberno de España. E no último treito do programa, Entrevista co Vampiro, un célebre personaxe compostelán esclarece en exclusiva aos ouvintes sobre a vida e costumes dos chuchóns.

Colaboran neste programa: Anxo Villaverde, Carlos Meixide, Expósito Alcocer, Marga Alborés e Carlos Santiago.

 



Alén da Onda 3

Descargar o programa en formato ogg clicando acá

Descargar o programa en formato mp3 clicando acolá

Nesta edición de Alén da Onda pescudamos novamente nos fenómenos paranormais que nos rodean, e cando dicimos que nos rodean é que verdadeiramente nos rodean. Comezando pola estraña desaparición? roubo? do Códice Caixtino na catedral de Santiago. Os nosos expertos analizan as últimas informacións arredor do caso, achegadas en boa medida polos compañeiros paranormais do correo gallego (guerra de sotanas, policías pata negra,…) e presentan documentos inéditos que avalan a teoría de que talvez os responsabeis do roubo estean entre as catro paredes da Catedral. Alén diso, explosiva entrevista en exclusiva à autèntica forza magnética que domina esta cidade e lle dá nome. Declaracións que fan abalar os alicerces do entorno catedralicio e que xa provocaron en menos de doce horas a inmediata demisión do deán.

Ademais, emisión en directo dun exforcismo a un coñecido personaxe da cidade, que debe levar o demo dentro pois non fai máis que xerar mal rollo, xerar insultos e xerar violencia en cada unha das suas aparicións públicas.

Colaboran neste programa: Expósito Alcocer, Carlos Meixide, Marga Alborés e Carlos Santiago.

Alén da Onda no mais alá do teu dial!!!

 



Alén da Onda – programa piloto

Descarregar programa mp3

Descarregar programa ogg

Un programa para mergullármonos de vez no mundo do paranormal. Maís aló do voso dial pescudaremos sobre todos aqueles misterios que escapan ás gadoupas do voso entendemento. Quen somos? cara onde imos? por que pasa o que pasa? que pasa? Acudimos @s nos@s expert@s nas artes ocultas e nos territorios do paranormal para procurar respostas que nos deixen abaneando de medo. Acudimos aos nosos devanceiros e internámonos nas lameiras do descoñecido para saber que opinan @s mort@s dos nosos cemiterios, que o que votan xa o sabemos. Ides pasar tanto medo que desexaredes non ter chegado a este recuncho. Xapón, a fin do mundo? Rubalcaba, un sucesor ou apenas unha plataforma espectral? Libros que se moven de sitio n Gaiás?

A resposta está, se é que queres escoitala, en Alén da Onda

Colaboran neste programa: Tomás Lijó, Ana Triñanes, Víctor Mosqueira, Expósito Alcocer, Carlos Meixide, Marga Alborés e Carlos Santiago.

Emite-se na Kalimera as quintas (xoves) de 20h 30′ a 22h (aprox) e repetira-se terças (martes) às 23h e sextas (venres) às 17h e domingos às 19h30′